Kif jaħdem il-kalkolatur tal-inflazzjoni personali?

Il-kalkolatur tal-inflazzjoni personali jiddetermina r-rata tal-inflazzjoni personali tiegħek abbażi tax-xejra tal-konsum tiegħek. Alloka l-infiq tiegħek ta’ kull xahar fid-diversi kategoriji ta’ oġġetti u servizzi biex issir taf bir-rata tal-inflazzjoni tiegħek. Imbagħad tista’ tqabbel ix-xejra tal-infiq tiegħek mal-medja f’pajjiżek.

Pass 1: Agħżel il-pajjiż fejn tgħix

Agħżel pajjiżek biex tqabbel ir-rata tal-inflazzjoni tiegħek mal-medja nazzjonali. Tista’ wkoll tqabbel ir-riżultati tiegħek mar-rati ta’ inflazzjoni ta’ pajjiżi differenti taż-żona tal-euro u mar-rata ta’ inflazzjoni għaż-żona tal-euro kollha kemm hi.

Pass 2: Daħħal id-dettalji dwar ix-xejra ta’ nfiq personali tiegħek

Daħħal l-infiq tiegħek fit-12-il kategorija ewlenin. Jekk trid kalkolu aktar dettaljat tista’ tuża wkoll is-subkategoriji biex tkompli taqsam il-konsum tiegħek. Ipprovdi l-aħjar stimi għal kategoriji li fihom spejjeż relattivament rari iżda għoljin. Għall-karozzi, iddividi l-prezz totali tax-xiri li ħallast għal karozza ġdida jew użata bl-għadd ta’ xhur li qed tippjana li tużaha. Pereżempju, jekk qed tippjana li tuża l-karozza tiegħek għal sitt snin, jiġifieri 72 xhur (6 x 12 = 72).

Pass 3: Ir-riżultati tiegħek

Iskrollja ’l isfel biex tara r-rata uffiċjali ta’ inflazzjoni għall-perjodu ta’ żmien magħżul u r-rata ta’ inflazzjoni personali tiegħek. Id-differenza bejn iż-żewġ rati tindika jekk ir-rata tal-inflazzjoni personali tiegħek hijiex ogħla jew aktar baxxa mir-rata uffiċjali tal-inflazzjoni. Tista’ tara wkoll liema oġġetti u servizzi rreġistraw l-akbar bidla fir-rati ta’ inflazzjoni individwali tagħhom. L-istampi li jidhru f’“Il-basket tal-konsum personali tiegħek” u “L-istorja tal-inflazzjoni personali tiegħek” juru x-xejra ta’ nfiq personali tiegħek meta mqabbla mal-valuri korrispondenti tal-HICP u jimmappjaw ir-rata ta’ inflazzjoni personali tiegħek matul iż-żmien.

X’dejta juża l-kalkolatur?

Sabiex tistma r-rata ta’ inflazzjoni personali tiegħek, il-kalkolatur jeħtieġ id-dejta li ġejja: l-ammont medju ta' kull xahar li tonfoq fuq oġġetti u servizzi (trid iddaħħal din id-dejta int stess) u dejta dwar żviluppi fil-prezzijiet ta' oġġetti u servizzi mixtrija minnek (il-kalkolatur jikseb din id-dejta awtomatikament mill-iStatistical Data Warehouse tal-BĊE).

Id-dejta dwar in-nefqa tal-konsum tiegħi tinħażen?

Id-dejta dwar in-nefqa tal-konsum tiegħek ma tinħażen imkien. Il-kalkolatur juża biss dejta ġdida mdaħħla. Jekk tħassar xi ċifri li ddaħħal jew tagħlaq il-kalkolatur, dan mhux se “jiftakarhom”.

Kemm tiġi aġġornata d-dejta użata fil-kalkolatur tal-inflazzjoni personali?

Id-dejta dwar l-iżviluppi fil-prezzijiet użata fil-kalkolatur tal-inflazzjoni personali titniżżel mill-iStatistical Data Warehouse li jaġġorna d-dejta dwar l-inflazzjoni kull xahar. Dan ifisser li l-frekwenza tal-aġġornament tad-dejta użata mill-kalkolatur hija wkoll kull xahar.

Kif tiġi kkalkulata r-rata tal-inflazzjoni personali?

L-istima tar-rata tal-inflazzjoni personali hija ċifra li tiġbor fil-qosor il-bidliet fil-prezzijiet tal-oġġetti u s-servizzi kollha li persuna tixtri. Jekk individwu jixtri aktar oġġetti u servizzi li jirreġistraw żidiet fil-prezzijiet ogħla, ir-rata tal-inflazzjoni personali tiegħu tkun ogħla mir-rata ta’ xi ħadd li jixtri aktar oġġetti u servizzi b’żidiet iżgħar fil-prezzijiet. Ir-rata tal-inflazzjoni personali hija kkalkulata bħala medja “ppeżata” tar-rati tal-inflazzjoni tal-oġġetti u s-servizzi kollha kkunsmati minn persuna waħda. Il-piżijiet huma ugwali għall-ishma tan-nefqa mdaħħla minnek.

Il-kalkolatur jipprovdi stima perfettament preċiża tal-inflazzjoni personali?

Il-kalkolatur jipprovdi stimi personali tal-inflazzjoni, iżda biex ikun perfettament preċiż, jeħtieġ li jinkorpora d-dejta kollha li ġejja:

· Il-prezzijiet attwali ta’ kull prodott u servizz li jinxtara

· Il-prezzijiet tas-sena ta’ qabel għal kull prodott u servizz li jinxtara

· L-ammont ta’ kull xahar li jintefaq fuq kull prodott u servizz individwali

Għalhekk, għalkemm huwa possibbli li tiġi kkalkulata rata ta’ inflazzjoni personali assolutament preċiża, dan ikun jeħtieġ sforz addizzjonali sinifikanti biex tinkiseb id-data kollha.

Tista’ ssib kalkolaturi tal-inflazzjoni simili fuq is-siti web ta’ wħud mill-istituti nazzjonali tal-istatistika taż-żona tal-euro u tal-banek ċentrali nazzjonali:

Banek ċentrali:

Oesterreichische Nationalbank

Lietuvos bankas

Istituti nazzjonali tal-istatistika:

Statistik Austria (l-Awstrija)

Statistikaamet (l-Estonja)

Tilastokeskus (il-Finlandja)

Insee (Franza)

Destatis (il-Ġermanja)

Central Statistics Office (l-Irlanda)

Centrālā statistikas pārvalde (il-Latvja)

Lietuvos statistika (il-Litwanja)

Instituto Nacional de Estatística (il-Portugall)

Statistični urad (is-Slovenja)

Instituto Nacional de Estadística (Spanja)